مجموعة عامية عايش سعيد
>> الأربعاء، 16 فبراير 2011
سوق العيش
جعان ..
بيحلم بسوق العيش
مغرم بحب الوطن
والحب وحده ما يكفيش
مهموم بهموم الناس
وممكن اروح ما اجيش
عايش حياتى فى حرب
ودارى عنبر فى جيش
ناس بتكافح ع الرغيف
وناس بتصحى ع الحشيش
والمسطول من الوجع
سكران فى يوم ما يعديش
يا وطن ليه مش شايفنا
ولا نظرك شيش بيش
تحلالك اللقمة فى خشومنا
وتاخد ليه ما تديش
انا المواطن السايح ف دمه
ودمه ف بلده ما يساويش
حرامى بيسرق لعيش عياله
وحرامى نايم وحارسه شاويش
وليه الفقير عريان فى شتاه
اما الغنى بيطلعلوا ريش
مفقوع موجوع م اللى بيحصل
وقلبى اتعبى خرابيش
مرة م الزمن مرة منى
ومن وطن علمه كلمة ما فيش
ح أفضل ادور ع الراجل اللى ..
وتايه فى الدروب ما لاقيش
مستنى ف دنيتى اخرتى
وخايف الجنة ما تعرفنيش
صامم ودانى كاتم فمى
شايل همى اللى ما رحمنيش
سلامات
سلامات يا سلامة
تلات سلامات
لو الشكوة تعمل
ماكانش حد مات
طوق بيلف علينا
داير من كل جانب
النهاردة مليت منها
امبارح كنا اجانب
هنا الدار مش دارك
وهمك قاتل نهـــــارك
كترت مطباتك يا خويا
طاب مانت اللى..
ماشى باختيارك
الهم زاد ومين يقله
وعيش الحزن برانى
الواطى مين يقله
ع المعدن ال برانى
بجنيه فول
يا دنيا معقول
اللا معقول فيكى
يبقى معقول
وجنابنا المتعبية
نفسها فى الملوخية
زهقت من ريحة الفول
عيش مسلح
وجيب فاضى
راضى بيه مملح
وعضم سوس
يا بشمهندس
عايز تنجح تبقى تغش
وتنسى الكفاح
قول للواسطة معلش
وهندس وخطط
لا تبقى سعادتك
هندسة قسم "مش"
ويا ريتك تنافق
ولازما توافق
وتلبس الف وش
بيتنا المسروق المنهوب
بيتنا المبنى على كتافنا
متأسس ع الطوب
خايف لا الزلزال يخطفنا
وخايف يصبح مقلوب
وباحزانا الكون يسعفنا
خليه كده منصوب
لأحسن يتمنع
ومعروف الممنوع مرغوب
يا حج
ملكش فى التعب والكج
والطيب فى البلد دى
عانى منها وهج
واللى سرقها وقاعد فيها
رسم للسرقة منهج
والمهزوز عامل معزوز
كل مصيبة تلاقيه يترج
وكفاية كتر كلام
لأحسن ندخل فى بند النج
ملوك الهم
نحن ملوك الهم
نحن ولاد العم
نعرف ننكت وبس
محترفين فى الزم
لكلك فى الكلام وفنه
ونحب كل اللى بيفنوا
ملناش فى الوحدة ابدا
والكويس نبعد عنه
نحن ملوك الهم
ولا داعى من حبة نكد
كل ما عنينا تحلم
تصحى ع النار البلد
بنحب الحرير والناعم
ونموت فى اكل النواعم
الكل فينا فاسد
حتى زهر البراعم
نحن ولاد العم
اول بنوك الدم
دمنا ببلاش دايما
لبياعين الوهم
الدكترة
طاطا توب
وجايبة طب
جديدة هى ع الدكترة
اول بداية
عنوان الحكاية
جات مشورة
واصطباحة عملت سياحة
وعايشة حياتها بالمسطرة
طاطا توب
تحلم بلاب
وكام جيبة
تملا الدولاب
بت راجل
وسط المشاكل
رافضة الأزية والسهوكة
وتوقف تملى وقت البكا
ولا ليها فى الرغى
ولا فى المسخرة
احلامها صايرة
جوة دايرة
تقول يا رب
والمركب سايرة
وتملى تدّور
ازاى تغير
لون يومها الهادى جدا
للون زرعى زاهى مخضر
عازلة دماغها
ما تبصش ورا
عايش سعيد
انا المصرى
مشعلق فى براويز
القومية العربية
الوحيد اللى مآمن
انها لسه حية
والمرحومة ..
اللى ماتت مظلومة
بسبب ماتش
عيشتنا فى قصة
هتش ف هتش
وعاشت جوانا
اجرت قلوبنا
ايجار جديد
عملت حكاية
وف الرواية بتعيد وتزيد
ولا عمره المصرى استعبد حد
ولا عمره المصرى كان من العبيد
انا المصرى ..
بالعنصرين كريم
ولا عمر بلدى
ما كانت للحريم
ولا انا قواد
ولا حسّاد
انا اللى بزرع
وانا الحصاد ونادر الشهادة
لأرض لضاد
وعد معايا
كام شهيد
مظلوم معاكم ودا اجرى
واقول الكلمة ولا أجرى
دمايا فى الضياع تجرى
ومش عميل
ولا بميل
انا المصرى ودا اخرى
انا المصرى
وبمصريتى عايش سعيد
الزمان زمان
شالنى وحطنى
والرياح بالجراح
نفسها تهزنى
هاتى اخرك
صعب انحنى
قديها نار
وانتى عارفة...
ولا يهمنى
المهم اعيش مصرى
مش شرط اموت غنى
اموت فيها
على اراضيها
ما اموتش بعيد
انا بعترف
وزى كل مرة العب ياقلم واديها شخبيط
وقول اللى فى نفسى وانا حأعمل عبيط
كنت فاكرالجواز راحة ووسع بالقراريط
طلع جواز انفرادى سلك شايك فى حيط
نكد وكبوات وحموات جنبه الموت بسيط
فنن فى الغياب ع الوعى فى بير غويط
واغرق معانا فى بحر النكد واشبع بلبيط
ركز يا قلم واوصفى من الدخلة
ظبط الكلام دا السر فوق النخلة
عفشى عهدة على فكرنى بالمخلة
تطبيب ومخك يغيب فى كل مداخلة
ترضى مين حيران مع الأطراف
ترضى الحلال ولا م الكباير تخاف
تطلق امك والا المدام فين الانصاف
كرهت الدنيا والعيشة وكملت الاوصاف
وطريق الحلال بجد سد لقاه اختلاف
شفت واللى عرفنى زى اللى ما شاف
غلطة سودة م الاول ...
وجريمة يا خويا وأدى الاعتراف
الله أكبر
الله اكبر الله كبر
تسمعها رنانة
من القلعة للأزهر
وجلاليب بيضة
فى الميادين بتظهر
الايمان الفجائى الرمضانى
خايف لا يكون بس مظهر
والمعدة الخاوية حاوية
من بعد الآذان شغالة
فيه ناس بتفطر م الطبق
وناس بتفطر م الزبالة
وناس صايمة مع الملايكة
وصومها اشتغالة
وناس مع ربها
عايشة على قد الحالة
لابد من طاقة ...
طاقة قدر
نكن ع العبادة
ونصلى الفجر
ونخبى الصدقة
لأجل ناخد الاجر
وندعى ربنا
يفك العسر
ما هو دايما ف الاخر...
لله الأمر
كده يا تريلا
فضى السكة
ورايا تريلا
سايقها مجنون
لابس حلة
حملها بضاعة
صنع المحلة
عجلها داير
وكبينتها بيلا
معاها ترخيص
الغالى قدامها رخيص
مش عايزةحد يرتاح
وحتمشينا قدامها بلابيص
فضى السكة
دى سكة ابوها
ملعونة الركوبة
ع اللى جبوها
وملعونة السكة
باللى مشيوها
تريلا حمرا
ماشية بكفن على اسفلت
فيها طير غريب
اظنه غراب منه اتنفخت
وليه فيها
اكتر ما ليها
فى النصيب والبخت
مليانة هم
متعاص فى دم
ومش مهم
المواطن فوق
المهم يبقى تحت
بلح
الصمت عايش ع النخيل
ساكن فى قلب البلح
والظلم وسط البلد
مهيص عامل فرح
بلع فى كرشه هموم الناس
مش حاسس باللى انجرح
ملعقته الدهب مليانة دم
وحياته قضاها فسح
واكمنك يا نخل عالى
عمرك ما فى يوم راح تطاطى
ابريم على زغلول على دمياطى
خليك فى العلالى وفوت باعتباطى
فى اللى راح يعوض عليك العاطى
وكفاية اقولك العالى عالى
والواطى حيفضل واطى
واه منك يا بلح
واحد سحلب
أخر اليوم....
قاعد عالقهوة بأستغرب
جوة منى شيطانى شى تانى بيدحلب
وسواس خناس من النار كل مادا يقرب
وبرفع ايدى اسقف واتصرف اقول سحلب
قعدة القهوة عجب بس طرطق ودانك
تسمع حكم وعبر واخبار من تحت حيطانك
وكلام بنات وستات واشى مين اتجوز و أشى مين مات ومين خانك
والقهوجى مرتجى فى النميمة والشتيمة
م الباشا للعربجى الكل جاى عشانك
ياه السلطان برقوق وصميت وبيض مسلوق ومحامى واكل الحقوق قاعد مكانك
يا دنيا شخت بخت عل ايدك اتسلخت
حرام من الهموم اتملخت يا رضا راح زمانك
عشرة دومنة ماحنا دوخنا قهوة
ولا دى موكنة فين الحساب
افتح النوتة الدنيا شوتة حتى البنوتة
نصيبها و حسابها خاب
ح أكتب قصيدة فى النيا العنيدة
احلامها البعيدة شايفها سراب
بين سطورها وعد مكتبوبة رعد
من أول أما بعد حكاية الشباب
حكاية منيلة مليانة بالبلا قصة
مجلجلة مضمونها الاغتراب
بطلها واحد م الشعب صامد فى القهوة قاعد وربنا اللى أخد هو اللى جاب
واحد سحلب تانى
منه اتسلى
واسلك سنانى
ومنه اقتل
الساعات والثوانى
واتأخر بحجة
وفى الأخر ...
رجليا مروحانى
فى القهوة كون
بعيد من الكون
اشى سياسة
واشى كورة
سوق للنخاسة
قهوة للشورة
انا قاعد سلطان متربع
وانم واهم وبالاهتمام بأستمتع
هارون زمانى يا خويا
يفك لما ياجى البعبع
مراتى الرغايا
عملالى حكاية
الواد سخن
الواد فى الشوايا
وبدل النقدى
قاعد فى الدفايا
مافيش غيرها شكك
القهوة ام الصبايا
خلينى قاعد كدة
لما اجمع النهاية
اقرا الجديد حيغروا النشيد
بعد مااتربينا عليه
الشئ الوحيد
اللى راضين بيه
حيغيروه
بين قوسين حيصنفروه
بس يا ترى النشيد الجديد
من فين حيستوردوه
خوفى ليكون صينى
ما تفرقوش عن اخوه
ولا تايوانى مضروب
فى الخلاط يضربوه
اوعى ظنى يصدق
ويكون امريكى امركوه
وع الهيب هوب نرقص
دانس ونظبطوه
حيغروا بلادى بلادى
ويجيبوا المصيف فى الوادى
وعبد الكريم يبقى جون
وجون يبقى هنادى
واعمل شعرى ضفيرة
والنيل ينفد ع الهادى
شررم ..اوه ماى هارت
قصدى فؤادى
الرجل ربنا يرجعه
قبل النشيد ما حد يرقعه
وضميرى يمشى نايم
وصعب امنعه
والرشوة تبقى تبس
والجيب م الفلس نوسعه
النشيد دأنا
ورث النيل ومصنعه
عهده جيش حالف عليه
اصونه مش اضيعه
وخايف اكون اخر مرة
اقوله او حتى اسمعه
مولد النبى
نور من السما
على نور من الأرض
لابعدك شفنا نور
ولا زيك تانى حد
يا مزمل بالشفاعة
جددت للنور عهد
الأمين من صفاتك
ووصفك فاق الحد
بحق طه يارب
تنعم علينا بود
يصون مسلمينك
وترجع بيه المجد
وتخلى يوم مولده
فواح نسيم وورد
وتكرمنا يوم بزيارته
والرجا يصبح وعد
من غيرك كريم
يؤمر الجبال تنهد
عزيز عينى التهامى
ملك قلبى أحمد
وكل مالذنوب تكتر
أجيب فى ذكراه وأنشد
صلى الله على يس
صلى الواحد الأحد
وعلى آله وصحبه سلم
واللى ذكره لازم يسعد
تحت بيتنا واوات
القلب
لا زاد فى حنكى ولا خشمى
والوجع غارف من مالى
وصمام القلب ما خشه مى
بس بيطهر ولاقال انا مالى
الحساب
الرب واحد من فوقنا
أمن بالله والحساب يهديك
قامت القيامة فوقنا
مين بالحسنات يهديك
عشق
عشقتك يا صبية والعشق قلبى
وغدرك فى ضهرى سكينة
كان مالى بعشق قل بى
خلانى جانى وهى مسكينة
كعابى
مشيت مشوار الأدب كعابى
نقشت اسمك على حجر واوى
وجاه الموت والشعر فى كعابى
استغربوا هما وقالوا حاوى
كلمات
يا ميتين اصحوا وانطقوا كلمات
هوايل حصلت ما فى الحسبان
وف دنيا الفلوس الكل مات
والصدق اتمنى يحس ويبان
أم
نور امى أخره ومداه فين
وبعادها عنى علعلنى
دمعتى وجدى عندى مدافين
بكرة يتكشفوا ع العلنى
القضية
فاتح بيبانى ولا حد جانى
قاعد ايه مستر جى
هضموا حقى بقيت جانى
ولا سمع "ميتشل " ولا مستر "جى"
البرئ
ينشف الحبر والرصاص يتبرى
والظلم ع الحق لازال متحايل
ليه ترضى تموت برى
تحت أول واحد من ميت حايل
العوازل
فتحت ودانك للعوازل
صدقت الكدب ولابس
توب الخشا لما عوا زال
وحلفت تانى ما انا لابس
مسرحية
شدى حيلك وارسمى نجمك فى الفلك
وكملى دورك يا قدس فى المسرحية
واعلمى انه لو نصبولك الفلك
راح يفضل اسمك طول ما مصر حية
مدرسة
وكام سطر قريته فى المدرسة
وكام حرف علمنى
جهل الشين كمد راسه
وعلم الدين على منى
ميراث
مركب وفين مراسيك
ميت ولا تراب دافنك
ايه فاضل من ميراثيك
غير شعرك ودا فنك
الوضع
ولا خيرةَ فى بكايا ولا مسيحى
وسهر الليالى البردانه
مصر من زمان مسلم ومسيحى
علم ورفعناه برضانا
أعداء السامية
ما أعرفش اعادى حد
لا سامية ولا حامية
واللى بيعملوه الحاد
يستاهلوا عشانه الحمية
كادر
مدرس وحاله كمكم
مستنى اصاف الكادر
ويقولى ياخد كام كام
ان قبض ليلة قدر
اخوكم العبد لله أنا
مبلى بالشعر يا حليوة
اول ما تنزل قنا
اسأل على محمد عليوه
غرام عفاريت
الى صديقى صاحب القصة الحقيقية "ربنا يشفيك "
الشيخ ...
اتكتف اتربع
وقفنا حواليه فى مربع
قلنا آمين عشمانين
نشوف ونسمع
كلام الحاضر الجنى
اللى جانى وعطلنى
صحانى من ثبات نومى
خلانى اعملها فى هدومى
وقال الشيخ ...
المسك فين
واللى اتمسك مين
لمسة ولا همسة ولاعين
"يا بنى آدمين "
صرخ فينا ملبوس
مش عفريت الفانوس
ولا مصاص دماء
دا عاشق منحوس
اتبلى بالعشق داء
والصبية انسية
ماتت جوة منها دمعة
زى العفريت مبلية
عشقت ود الناس
والناس جرحتها هى
والعشاق مش عفريت
دول بالألف والمية
وانا زيهم ..
لا دا انا منهم
بس راحت علية
بص لى العفريت من عينها
قال لى ايه بينك وبينها
ارسمها شجر وارسى على غصونها
واحلمها حلم واصحى على عيونها
وشيلها كنز وانت اللى ح تصونها
قلتله صعب
انا زى حالتك
ايه تبقى بعيدة
وهى بنت خالتك
جاه ونفوذ
وجيبى مهزوز
صعب ادخل سبق
فيه غنى وأفوز
صرخ الجنى حرام
موت من غير كلام
الشيخ قال اخرج خرج
وسكت أنا بالتزام
بصلى الشيخ وضحك
امنى اتبليت بالغرام
زقزقة
يا دنيا يا مزقزقة زقزقتى مين قبلى
عايش احلم باللقا مش راضية ليه تقابلى
مجنون يدور ع السعادة من بحرى لقبلى
انا كنت عايش فى حالى وبحالى راضى
ياجى بكرة ازعل ع اللى راح م الماضى
اتعلقت بيكى ليه .. وليه فيكى بدادى
وزعلتى من ليه وانت اللى جارحة فؤادى
علمتنى احلم وانا ماشى , قولنا الحلم عادى
جيببى اللى ح تجيبيه يا ما الزمان جابلى
يا دنيا يا مزقزقة بس فين وشك
تروح للى يخدعك يجرحك ويغشك
ترقصى ع النفاق هشك على بشك
يا دنيا يامكحورة قرفت من هتشك
قولى مين انا... لأحلف ما اعيشك
اوعى تلعبى معايا دانا اللى كاشك
مسيرك يوم تفرحى ....
وترقصى على طبلى
الزناتى 2010
الزناتى خليفة
والدول الحليفة
بعتولى اميل
الكدب فيه جبل
والصدق فيه قليل
سندوتش حلاوة
محشى غباوة
واحلام الثانوية
بت الكلية
وحبيبة غريبة
بنشوفها ضيفة
**********
الزناتى خليفة
كدبه حايق
حاله رايق
شايل هموم
ومش مضايق
شربت هتشه
أدمنت نتشه
دا الزناتى ....
ولا دا بلياتشو
يحلم علية
واحلامه ظريفة
*********
أسسها حزب
اعلنها حرب
فارس همام
من غير برشام
راح يهزر
من الضحك بسكرر
بقصة حب
ولا منه سابنى
ولا حتى جابنى
واسلى بيا
وعملنى لب
فصيح فصااحته
بتبان فى ساعته
وتبان فى رجله لما تدب
سافر بيضحك بجيوب نظيفة
************
فوق الفقير
تحت الوزير
ساكن شقة
فى بطن الزير
يركب سفينة
مرساها سرير
ويجرى فى النت
يدور ع البت
واللوجو...
العبد الفقير
والبت حيرة
ما كنتش جيرة
ولا من الغربة
ولا أميرة
ولا بت أمير
بعيون نانسى
ورموش لطيفة
*****************
راح الامارة
زادوا الحيارة
وأستنى شاته
على موقع زناتو
باسورده كلمه
فى قصة حياته
وحبيبته واحدة
مش حتكون مراته
وأمه عايشه
فرشاله فرشة
تستنى كدبه
وتدعى ربه
يرجع البيه
يسد اللى عليه
وينهى ..
القصة العنيفة
والله يا افندى
انت عندى
زى اللى عايش جوة منى
على سرى أأتمنك
وانت تآمنى
الحكاية حقيقية
مية فى المية
لغز كبييييييييييييييييير
حله مش عندى
الشاعر ان ماكلمش الكلم يخرس
تتولد الكلمة بريئة وينعس
يحلم بكون متغير شكله
ويصحى ولا يمكن ييأس
ع السبورة
طلع الولد ع السبورة
قلتله ارسم بلد
رسم بلد مبتورة
قلت ارسم جدع
قال يا مستر خلع
وفضيت الصورة
سكت .. صعبت علية نفسى
" ادخل يا ابنى ميرسى "
حتى العيال عارفة
اللى بيدور فى حسى
حتى العيال لها قلوب مكسورة
من مذكرات رجل عادى جدا
يوم ميلادى
سألت ابويا عنه
قال لى " يوم عادى "
كانوا فيه بيضحكوا
وانا بأبكى على بلادى
سنة غريبة
جاية بميت كفن
زيها زى غيرها
ضرايب للزمن
وقالولى مت
والموت فية سكن
وسبحانه فى خلقه
اى ماش للآن
مشىّ المكن
وزى زى الناس
بكره شيطانى
واحب الوطن
واحترم الفران
وأسقف للعجن
واركب قطر 12 ساعة
فاهمين المغذى يا جماعة
وانا فيها متغرب
بلد غير البلد
ووادى غير الوادى
ودا اول يوم فى ميلادى
مصر العالية
يا مصر فى العلالى عارفك لن تتطاطى
ماهو النخل شاقق السما زغلول او دمياطى
وليه يرموكى بالحجارة وتشكريهم.. ؟
ما انت عارفة الواطى حيفضل واطى
العيد خروف
خروف العيد قبل ما يندبح بصلى
بيقول اتعظ يا بنى ادم م اللى حصلى
اوعى تاخدك الشهامة وتنسى
تموت خروف وتروح وتولى
قهوة
قاعد ع القهوة المتكتكتة
قاعد واحلامى كلها مثبتة
وفجأة يركن الحلم ع السطر
وتطلع اشعارى متعفرتة
مالية
مالى ومال البلد فى المالية
وحب الوطن هم وهو كل مالية
وكل ماانسى تفكرنى شوارعها
وطرقها الواسعة ومصانعها
ويطفيها الشوق ويرجع يولعها
وهى ايه من غيرى
وانا ايه بلا هى
واللى بنى مصر
كان من ولادها هى
كشف
ياشمس اصفى
ويا مطرة بطلى ترخى
ويا قدس باليمين سلمتى
ممكن باليمين تطخى
ربنا اللى سترها
قادر يرجع نهارها
ويرتاح ضميرى من العتاب
اللى عملى كشف حساب
ملا صدرى وكمان مخى
بيعة
بعد الشقى والجرجرة
بعد الفضائيات والمنظرة
قالوا حيبيعوا البلد
وامتى البيع يا ترى
سؤال
الولد فى الفصل قام
قال سؤال وسط الكلام
يا ابنى ما تسألش تانى ...
ما اعرفش المواطن بكام
شرطة
ظابط وزعق انزل
شكيت للباشا وندل
اتاريهم طابخينها سوى
وعاملين لى محضر متلتل
غريب جدا
واحد غريب بشوفه ع القزاز
شكله شكلى ودموعه عزاز
لكن ليه ملوش صوت ...
وباين ليه حالته جاز
العمر و الألم
عدى العمر واهو بيدور
يخف الألم ومن تانى يظهر
سالت الططبيب ايه العمل ...
قال بلاش تانى تسهر
حمارة الحاوى
حكاوى حجاوى
ماشى رراكب
حمارة حاوى
افنن واطمن
كل اللى يئمن
ديب ع الغنم
وأمانه يجنن
مسلم معلم
فى نفسى بكلم
وليلى المضلم
ونهارى المبلم
ع السكوت ناوى
وفيشة فى خيشة
شباب فى الحشيشة
عالم مدرمغ
وفاكرها عيشة
دى عيشة البلاوى
العيال حلف
والأمام دا خلف
احزانى فى صف
منتهى الضعف
جرحت مشاعرى المطاوى
ربنا اللى خلق
ناس من غير خلق
قادر يعمل قلق
يتلم اللى اندلق
ويكمل الخــــــــــــــــــــطاوى
تلاتين سنة
تلاتين سنة
وانا زى ما أنا
اتولدت عريان بأبكى
ولازلت بأبكى ع الهنا
كل أصحى اقول
النهاردة حتفرج
وتضيق تانى
والروح صعب تخرج
تلاتين سنة
ابويا مستنى خيرى
وقلبى مستنى طيرى
وخيرى اهو سارقه غيرى
تلاتين سنة
والعذاب مصيرى
قالولى مش راضى اصدق
انى وانا صغير
كنت فى نومتى حأغرق
ومن المية للفقر
الموتة مش حتفرق
تلاتين سنة
تعبت والله
وكل ما احلم حلم
تفسيره دواهى
وكل ما أمشى طريق
مسدودة تجاهى
خلينى كده
مستنى رحمة الهى
تفكير بصوت عالى
1
يا دنيا زى الدكان المفتوح
تعشقى بغمز العين اللحلوح
انا فيكى اخلص بايه ..
انا طالع شهيد ولا مبطوح
2
رمى الكلام دبش فى دبش
زمن الهئ والمئ
من امتى النجاح غش
من امتى حذفوا " لأ"
3
مدرس مهمش وجيبى فاضى
اقول نصيبى وبحالى راضى
احتمال اعطس واروح فيها
ويمكن يحبسنى القاضى
4
كلمة فى صدرى مش ممكن تطلع
وكلمة تانية فى قلبى حتولع
خايف اقول الآه يضحكوا
واسكت من خوفى الناس تسمع
5
ع النيل شايفها عيونها مية
والقلب راسمها وحاسسها هى
يا بلدى ليه بحبك
وليه حبك صمت وقسية
6
قالوا الجرى نص المجدعة
قلت اهى مصلحة
هى ناقصة ابطال المعمعة
البطل اخرة باب المشرحة
وعجبى
